新星海鮮火鍋酒家,帶子任食!

好仲意打邊爐……特別係自助餐果隻.

E家出街食晚飯超麻煩,凈係諗去邊食都已經諗爆頭.最慘都係順得哥情失嫂意,搞到兩面不是人.去到仲要諗食乜,係呢度我向咁多位活動搞手致以萬二分既敬意.

食自助餐就最好,仲意食乜就食乜,又通常冇時間限制.不過最衰西式自助餐平既都平均去到百五.但係中式火鍋自助餐就平好多,平均一百蚊鬆d,任點任食都算超值!

自己都算仲意食中式火鍋.食過既都唔算少,好似:新星,幸福樓,敘福樓,明星,福興,金豪等等.講質素心中已有排名,幸福樓係最低分,係平係多野食又點,d野係難食呀麻!

講番新星呢度位位六十八,湯厎另計,有落單紙,幾十款任食任剔,啤酒汽水全部任飲.埋單位位一舊多dd.

質素全部中上,手打四寶丸值得推介.不過不得不提既就係鎮場之寶……帶子喇!你冇睇錯,呢度既帶子係任食既!以前連珊瑚旁貴妃旁都一樣任食!真係勁抵!!

帶子當然唔係連殼上蒜茸粉絲清蒸果隻,而係急凍貨.不過仍食得出佢既鮮,爽,甜.呢度絕對唔姑寒,唔會一兩隻咁上,一黎就一大碟一大碟咁.食得勁豪,勁爽,勁過癮!

不過唯一要彈既地方就係要九點打後先有得食.你話叫d五點準時放工既點幫襯?但點講都好,係好野就緊係要介紹下. ^__^

地址: 長沙灣長沙灣道680號麗新商業中心地下
電話: 2991-4903