文記粉麪茶餐廳

慈雲山既毓華里食肆很多。高級既就欠奉，草根有歷史既就有唔少，尤其是茶食廳。短短一條街就差唔多有成十間。質素當然有好有唔好。但講到優質既茶餐廳，莫講話慈雲山，就算全港黎講，文記粉麪都應榜上有名。

好食既野，實在太多，就抽幾樣簡介下。

常餐 -- 同其他茶餐廳一樣，都係奄列，叉燒/牛肉公仔麵加杯野飲。Mud都唔講，公仔佢地十年前已經只係用出前一丁唔駛加錢，其他茶餐廳用既大光麪有幾好食大家心照。剩係呢樣小小既心思巳可知老闆係對食有要求既人。其他既，當然唔會差。

奶茶 -- 有茶味有奶味又夠香滑，仲想點。真係試過同十大奶茶之一銀龍比較過，真係不相伯仲 。

煲仔飯 -- 冬天先有，價餞稍貴。雖然唔係好似廟街興記咁用炭爐，但係仍然煮得爽身有飯味兼粒粒分明。皆因每煲煲仔飯皆由老闆係店門口親自操刀，每煲都係精心傑作。可惜既係只得冬天有得食。北菇滑雞乃係不二之選。

晚餐 -- 老實講我食佢地既晚餐分分仲多過係屋企食飯。佢地每晚都有特價晚餐，只收廿蚊之餘仲有四款可楝。咁平既價錢咁正既質素，可謂超值到予欲無言。小弟既至愛獨沽一味，咸魚雞粒炒飯。炒飯夠乾身，咸魚夠咸香，雞粒夠口感，再加埋杯凍奶茶，食完之後此生無憾矣。

有好野就一定要同大家分享。特登上黎就無謂。有緣經過既，不妨試一試。

地址: 慈雲山毓華里31號D 地下
電話: 2242-2446