深水埗維記架啡粉麫
呢間食肆我相信好多人都聽聞過，撞到個係深水埗住但未聽過或食過維記既我相信同你中六合彩頭獎既機會差唔多。佢最出名既係潤牛麫同加央多。全香港有得食潤牛麪又整得好食嘅茶餐廳真係屈指可數。等左幾個字先有位，同個friend 坐低就即刻叫左:

潤牛麵 -- 出面唔多有得食唔係因為豬潤難處理，而係難整得好食。煮得稍為過火就un切得稍為厚D又唔爽。呢度D潤就真係不慍不火，恰到好處。爽趣，鮮嫩 ，超正。但係牛肉就得個字淋字，冇味！個面就用左8成茶餐廳都樂於採用(因為平)，出晒名難食既”大光麫”。所以個面又淋又唔爽口就預左架啦。不過都唔緊要，因為其實成碗麫最正係個湯底。個湯係用D潤滚出黎，滚到起晒沙，所以你会見到碗湯有好多粒粒同薑 屑係度浮下浮下。個豬潤湯好鮮甜無味精，必試!

咖央多 -- 好的式，係一塊中間擦左少少咖央既厚多，點左蛋漿後放上鐵板煎而唔係油炸。據知呢 度既咖央係由蛋再加牛油同糖打成，有別於一般罐頭椰醬咖央，所以好賣時就要等佢再整，未必即叫即有。方包就照西多士的做法，醮蛋再煎，好香口。

佢呢度有個幾唔好嘅特式就係無餐叫，全部野食都要散叫。你知啦D餐普遍黎講都抵食D架麻，可以吸引多D人黎幫襯。佢無餐食都可以日日坐無虛席，平日下午四點都坐滿，一個人去都要等位。呢D就係”食力”啦。佢地 d伙計落單唔用紙筆，只靠把口但係十分準確，好少落錯單，速度又快，我呢d老人痴呆真係佩服得五體投地。只可惜呢度太早收工，過左下午茶就無得食。D嘢唔算平。潤牛麫17，凍奶荼11，咖央多10。係深水涉食呢個價錢算貴架啦，不過只要係好食既，收貴少少又有mud所謂ar~

地址:深水步福榮街62號及66號地下及北河街165-167號地下D號
電話: 23876561